More Than Coffee: Karaang Pagkaon, Dili nato Limton!

Nakadumdum gyud ko sauna, nisabay mi sa akong lolo kay moadto mi sa merkado.  Nangita akong lola ug suman ug nilusak na saging. Lami daw ni isabay sa init na kape sa pamahaw ug snack sa hapon. Nangutana ko kung unsa ang nilusak na saging kay pamilyar ra ko sa suman. Pag abot na namo sa Cogon ug nakapalit na mi sa mga tugon sa akong lola, gihatagan ko sa akong Lolo Rudy ug nilusak para daw dili ko ma-ignorante. Pag tilaw nako, dili kaayo ko ganahan pero gikaon gihapon nako kay dili gyud na sila gusto masayang ang pagkaon, ipa konsensya dayun ko ug “daghan gigutom karon” mao bisan dli kaayo nako gusto, ako nalang gyud gihurot. 

Taod taod na pud to, mipanaw na akong Lolo Rudy. Karon diri sa Cagayan, dili na ta makadungog kaayo ug naay gabaligya ug mga kakanin na Suman, Nilusak na Saging mahulog na lang kini na special order kung naay mga lola nato or mga iyaan nato na mouli gikan sa langyaw na nasod na gimingaw sa ilang naandan na kakanin. Karon, uso na gyud ang mga cake, donut, pastries - bisan ang mga pan de sal karon tam is na. Sa akong nabal an ang Pan de Sal baya kay medto parat kay Sal gani unta pero gitawag naman ug Cheesy Pan de Sal. Usahay maka ingon ko ug hayahay raman sad di ay modako na naay Lolo ug Lola ba kay maka edukar.

Usa ka adlaw, naka dawat ug tawag ang among team, adunay usa ka Coffee Shop na naa sa usa ka mall ug kinahanglan sila ug mga pictures para sa ilang menu. Ilang mga baligya ani - mga kakanin pero dili basta basta na kakanin kay ang uban niini homegrown sa Zamboanga. Nakadumdum ko sa akong Lolo, makamingaw pud baya. Ang ilang mga kakanin pare pareho lang sa akong mga nahibal-an. Klase klase kini ug naa pud silay Sikwati, Kape na isog kaayo, murag isa gyud ka adlaw kang mata aning kapeha, dili pareho sa uban na duha ka oras lang milabay, katulgon na ka.

Malipay kong maka tuon na wala pa nahanaw ang mga kakanin nga tubong Mindanao. Sumala sa akong linghud na huna huna, sa Mindanao kini. Dili man hinuon ko sigurado, ug open ko sa mga correction kung masayup man gani ko tungod sa akong generation. Usa kini sa mga butang na gusto ko usab matun an aron dili pud kita maulawan kay proud ko na Kagay-anon. Kagay-anon kay lagi, diri naman ko gipanganak ug nagpuyo sulod sa 24 na ka tuig. Intensyon ko na mag representar nga maayong lumulupyo.